Qeydiyyat

İş sağlamlığı əmək mühitində çalışanların sağlamlığını qorumaq üçün nəzərdə tutulmuş fundamental tədbirlər toplusudur və əsas məqsəd sağlamlığın təmin edilməsi ilə yanaşı təhlükələrin aradan qaldırılmasıdır. SƏTƏM nədir sualına cavab olaraq qeyd etmək olar ki, bu yanaşma sağlamlığın qorunması və risklərin minimuma endirilməsidir. Məsələn, asbest tozuna məruz qalmaq xərçəng riski yaradır və bununla da sağlamlığa təhlükə yaradır.

Əməyin mühafizəsi sosial-iqtisadi, təşkilati, texniki, sanitar-gigiyenik və tibbi-profilaktik tədbirlər və alətlər sisteminə aiddir. Bunlar əmək fəaliyyəti zamanı insanların təhlükəsizliyini və sağlamlığını təmin etmək, bununla da əmək qabiliyyətini qorumaq məqsədi ilə müvafiq qanunvericilik və normativ aktlar əsasında həyata keçirilir (“Əməyin mühafizəsi haqqında Azərbaycan Respublikasının Qanunu”nda göstərildiyi kimi).

Əslində, təhlükəsizlik ciddi şəxsi zədə risklərinin olmaması deməkdir. Məsələn, qaldırma əməliyyatı zamanı yük altında (yanğın xəttində) dayanmaq ciddi xəsarət və ya ölümlə nəticələnə bilər. SƏTƏM qaydaları məhz bu risklərin qarşısını almaq üçün nəzərdə tutulmuşdur.

Ətraf mühitin mühafizəsi isə ətraf mühitdə mövcud olan təbii maddi sərvətlərdə ilkin kəmiyyət və keyfiyyət dəyişikliklərinin saxlanılmasını və qarşısının alınmasını nəzərdə tutur. Əsasən, əmək fəaliyyəti, iş prosesləri və bu kimi fəaliyyətlər zamanı ətraf mühitin – havanın, suyun, torpağın, floranın və faunanın çirklənməsinin qarşısının alınması hədəflənir.

Beləliklə, SƏTƏM sözünün açılışı Sağlamlıq, Əməyin Təhlükəsizliyi, Ətraf Mühit deməkdir və beynəlxalq səviyyədə HSE kimi tanınır.